Формула за идеална дремка

Цврстиот сон од осум часа е релативно нов изум. До индустриската ера, според историчарот Роџер Екирч, повеќето луѓе се буделе во текот на ноќта неколку пати, а „испрекинатиот“ сон го надополнувале со попладневна дремка.

Со други зборови, дремката е природна и добра за луѓето. Истражувањата покажуваат дека кратката дремка може да донесе повеќекратна корист – од зголемена виталност до подобра меморија.

Многу од нас се борат со потребата да прилегнат околу 14 часот, но веројатно не би требало.

Формула за идеална дремка

1. Попладневна дремка. Повеќето луѓе природно чувствуваат пад на енергијата шест до седум часа откако ќе се разбудат, што најчесто е околу 14 часот. Некои истражувачи дури сметаат дека потребата за попладневна дремка е еволутивна. Како што вели поранешниот директор на центарот за сон од Стенфорд за „Њујорк Тајмс“: „Се чини дека природата дефинитивно предодредила човекот да дремне во средината на денот, најверојатно за да се избегне пладневното сонце“. Независно од биолошките причини, попладневното затишје е идеално време малку да се дремне. Исто така, бидејќи не е блиску до времето за одење во кревет, нема да влијае на ноќниот сон.

2. Најдете темно, удобно и  тивко место. Веројатно ќе се чувствувате доволно уморни за да може да заспиете каде и да било, но истражувањата покажале дека овие фактори имаат  огромно влијание на тоа колку брзо и лесно човекот може да заспие.

3. Откријте колку долго да дремнете.

Бидејќи мозокот поминува низ серија различи фази откако ќе заспиете, различното времетраење на дремката, може да има изненадувачки различни ефекти. Во повеќето ситуации, кратка дремка од 30 минути или помалку (полната линија на графиконот) е идеална. Експериментите покажале дека ваквите дремки не доведуваат до голема поспаност и создаваат релативно краток наплив на виталност. За време на дремка во траење од 45 до 90 минути (линијата со точки), мозокот влегува во фаза на длабок сон, а после 90 минути (испрекинатата линија), во РЕМ фаза, во која се јавуваат соновите. И двете фази водат кон поспаност после дремката. Меѓутоа, експериментите покажале дека подолготрајните дремки доведуваат до подолготрајно подобрување на виталноста, па така, ако сакате да ги подобрите вашите перформанси – да речеме за шест часовно возење, најдобро е да дремнете малку подолго пред тоа.

4. Подесете го алармот. Ова можеби изгледа очигледно, но за повеќето луѓе е навистина тешко да се разбудат во предвиденото време, а успивањето може да заврши незгодно.

5. По избор: Прво, напијте се кафе. Звучи чудно, но кафе-дремката е многу реална работа. Од едно кафе на брзина (или друг кофеински пијалок), па потоа дремка од 20 минути, или помалку, може да имате изненадувачка корист. Причината за тоа е што на кафето му е потребно 20 минути да помине низ гастроинтестиналниот тракт и од крвотокот да влезе во вашиот мозок. Покрај тоа, кофеинот ве прави поенергични со тоа што ја отстранува хемикалијата наречена аденозин, што предизвикува чувство на замор, а спиењето природно го чисти аденозинот од мозокот. Тоа значи дека кога ќе се разбудите после 20 минути и кога кофеинот ќе почне да делува, ќе има помалку аденозин со кој треба да се справува и ефектот на кофеинот ќе биде поизразен. Неколку различни истражувања покажале дека луѓето кои прават кафе-дремки се многу поспремни и имаат подобра меморија од луѓето кои  пиеле кафе или дремнале, одвоено.

Изненадувачката корист од дремката

Дремката ја зголемува виталноста. Едно од најраните истражувања поврзани со дремката направено во 1990 година од НАСА, покажало дека пилотите во комерцијалните летови  кои ќе дремнеле за време на летот (се разбира, во присуство на копилотот), правеле значително помалку грешки и побрзо реагирале, после тоа.

Слични наоди се добиени и во бројни други области – од подобро внимание на екранот на комјутерот, возење ноќе, до приклучување на инфузии во итните служби. Се чини дека кратката дремка му го обезбедува на мозокот потребниот одмор за да може потоа подобро да работи.

Дремката ја подобрува меморијата. И неколку други истражувања покажале дека дремката на сличен начин ја подобрува и меморијата. Се подобрува повеќе она што се нарекува декларативна меморија, односно способноста да се сетиме на специфични делови од она што го знаеме (отколку процедуралната меморија, која е поврзана со помнењето како да извршиме некоја задача).

Во експериментите, луѓето кои се обидувале да запомнат одредени информации и кратко дремнале пред да бидат тестирани, биле подобри од тие кои цело време останале будни. Ова веројатно се случува бидејќи мозокот за време на сонот го консолидира она што е ново научено, што значи дека дремката може да биде многу корисна за учениците кога учат за тестовите.

Дремката може да ја поттикне вашата креативност и способност за решавање на проблеми. Иако нема многу истражувања во овој дел како за претходните две, трудовите што се направени, покажуваат дека и оваа корист од дремката е многу реална.

Најраните истражувања во врска со спиењето генерално (не за дремката) покажале дека спиењето им помага на луѓето да најдат неинтуитивни решенија за проблемите многу побрзо, отколку ако останат будни. Неодамнешните истражувања покажуваат дека дремка од еден час ги подобрува резултатите на тестовите кои се користат за мерење на креативноста. Други истражувања покажале дека дремката се чини им помага и на бебињата полесно да ја сфатат апстрактната релација помеѓу зборовите.

Дремката е пријатна. Да признаеме, сето претходно кажано во врска со користа од дремката, лесно може да се потисне со главната благодет од дремката – многу е пријатна.

Постојат и податоци што ќе го поддржат ова. Во 2006 година, економистите Даниел Канеман и Ален Кругер направиле истражување колку луѓето се среќни, тажни, загрижени или под стрес додека извршуваат одредени секојдневни активности. Дремката не била баш на самиот врв на листата на најпријатни работи (тоа бил сексот), но се нашла погоре од рекреативното користење на компјутерот и шопингот.

Дремката е една од наједноставните задоволства во животот и што е уште подобро- бесплатна е.

Поддржете ја нашата работа: