Повеќето пчели се хранат со полен и нектар, но одредени видови еволуирале за да се хранат со месо, заменувајќи ги цветните ливади со трупови на мртви животни.
За подобро да ја разберат оваа екстремна промена во исхраната, научниците од Универзитетот во Калифорнија-Риверсајд, Универзитетот Колумбија и Универзитетот Корнел ги проучувале цревните бактерии или микробиомот на таканаречените пчели мршојадци во Костарика. Истражувачите откриле дека цревата на овие пчели се богати со бактерии кои сакаат киселина, слични на оние кои се наоѓаат кај мршојадците, хиените и другите месојадни животни.
Нивната студија е објавена во списанието mBio, од страна на Американското здружение за микробиологија.
Само три вида пчели во светот еволуирале така што протеините ги добиваат исклучиво од мртво месо, а живеат само во тропските дождовни шуми. Сепак, според студијата, постојат и други видови пчели кои, покрај нектар, консумираат месо од свежи животински трупови кога ќе им бидат достапни.
Пчели и цревни бактерии
Цревата на тие видови пчели и некои бумбари се колонизирани од истите пет видови микроорганизми, присутни кај нив приближно 80 милиони години, се вели во студијата.
Истражувачите сакаа да знаат по што се разликуваат цревата на пчелите мршојадци.
Тие поставиле 16 станици со мамки од сирово пилешко месо, закачено на околу 1,5 метар над земјата. За да ги одвратат мравките, го премачкале јажето со вазелин.
Се собрале вкупно 159 пчели, вклучувајќи, за споредба, пчели кои се хранат со полен и месо, но и пчели кои се хранат исклучиво со полен и нектар.
Откако го проучувале микробиомот на пчелите со екстракција на ДНК од нивниот стомак, истражувачите откриле дека мршојадците изгубиле некои од основните микроорганизми што ги имаат повеќето пчели и развиле кисели црева.
„Микробиомот на пчелите мршојадци е збогатен со бактерии кои сакаат киселина, нови бактерии кои нивните роднини ги немаат“, вели Квин МекФредерик, доцент и специјалист за пчели на Универзитетот Риверсајд и автор на студијата.
„Овие бактерии се слични на оние кои се наоѓаат во цревата на мршојадците, како и хиените и другите месојадни животни, веројатно за да ги заштитат од патогени супстанции кои се појавуваат на мршите.
Тој додаде дека пчелите кои се хранат и со полен и со мрши имаат различни видови бактерии во споредба со оние пчели кои се хранат само со полен или само со мрши.
Една од бактериите присутна кај пчелите на мршојадците е лактобацилус, која се наоѓа и во голем број ферментирани човечки намирници, како што е киселото млеко, се вели во студијата. Утврдено е дека содржат и карнобактериум, кој е поврзан со варењето на месото.
Иако јадат месо, според истражувачите, медот на пчелите мршојадци е сè уште сладок и може да се јаде.
„Тие го чуваат месото во посебни комори (во нивните кошници) каде што е затворено две недели пред да му пристапат, а овие комори се одвоени од местото каде што се чува медот“, рече Џесика Макаро, докторант на Универзитетот Риверсајд, која е исто така учествувала во студијата.
