Зачувана опашка од диносаурус стар 99 милиони години е откриена во парче килибар кое го купил палеонтологот Лида Ксинг во некоја златара на пазарот во Мјанмар.
По истражувањето за коските на диносаурусите, ова е прв пат да се откријат сочувани остатоци од диносаурус во килибар, што ќе отвори можност за нови истражувања на овие изумрени животни.
Вредното палеонтолошко откритие со големина на кајсија Ксинг го купил од еден продавач минатата година. „Веднаш забележав дека тоа се остатоци од животни кои се заробени во едно парче смола, а не во делови на некои растенија” – изјави тој за „CNN“.
“Не бев сигурен дали трговецот разбра колку е вредно парчето, но сепак не ја покачи цената” – вели Ксинг.
Својот пронајдок го однел на КТ скен и микроскопска анализа по што се заклучило дека тоа е опашка од младенче на целуросаурус кој спаѓа во групата тереоподи. Пронајдокот повеќе наликува на Т-рекс и велоцираптор кои сме ги виделе само од Јура парк, одошто на денешните опашести животни.
Малиот диносаурус е со големина на врапче, а деталните анализи во музејот во Саскачеван во Канада откриле дека на горната страна има перја со боја на костен, додека долната страна е со бела боја. Освен перјата можат да се видат и мускули, лигаменти и кожа од диносаурусот, но она што го шокирало палеонтологот Рајан МекКелар била структурата на перјата која е далеку поразлична од денешните птици и помага да се открие како еволуирале пердуви.
