Дали сме свесни дека живееме под загадено небо?

Убавината на ноќното небо брзо исчезнува, како што покажува првата мапа на глобалното загадување со светлина.

Новата мапа покажува дека повеќе од 80 проценти од светот живее под загадено небо, од кои 99 проценти се однесуваат на САД и Европа. Една третина од човештвото повеќе не може да го види Млечниот Пат и како што покажува новата мапа, ноќното небо полека се повлекува поради сјајот на вештачката светлина.

Пред повеќе од една деценија, Фабио Фелчи, истражувач од Институтот за загадување со светлина и технологија во Италија, го објави првиот атлас на осветленоста на ноќното небо. Тој заедно со својот тим на истражувачи ги комбинирал сателитските податоци со мерењата на осветленоста на небото, за да го измери глобалниот сјај и своето истражување го објавил во „Science Advances“.

Мапата покажува колку ноќното небо во различни делови од светот отстапува од природната светлина на небото.

Постојат многу ризици ако продолжиме вештачки да ја осветлуваме темната страна на нашата планета. Вишокот на светлина ги попречува астрономските набљудувања од земјата и ја нарушува миграцијата на птиците, желките и другите видови. Дури и Американската медицинска асоцијација препорачува намалување на загадувањето со светлина, посочувајќи поврзаност помеѓу повисоките стапки на рак и други болести со нарушувањето на деноноќниот часовник, односно природниот циклус на спиење и будење.

Губењето на ноќното небо е исто така и еден духовен проблем, со оглед на тоа дека се помалку луѓе можат да ја видат убавината на космосот и нашето место во бесконечната шема на нештата.

Денес, се’ повеќе научници обрнуваат се’ повеќе внимание на ефектите кои загадувањето со светлина ги има на средината, а тимот на Фелчи се надева дека оваа нова мапа ќе претставува вредна алатка за идните истражувања.