За време на изведувањето на експериментот на надворешната површина на Меѓународната вселенска станица, руските научници биле збунети од откритието, кое всушност претставува храна што ја јадат китовите.
Примероците земени од рефлекторите и од површината на вселенската станица содржеле траги од планктони и други микроорганизми, па научниците се збунети како тие се нашле таму.
“Нејасно е како овие микроорганизми се нашле на површината на вселенската станица , со оглед на тоа дека тие не се карактеристични за Бајконур во Казахстан, од каде што вселенската станица е лансирана. Планктоните во оваа фаза од развој можат да се најдат на морската површина. Тоа значи дека се подигнати преку некоја воздушна маса и така успеале да стигнат на површината на станицата“, вели шефот на руската вселенска мисија, Владимир Соловјев.
“Интересно е тоа што овие планктони и микроорганизми можат да живеат во вселената и покрај недостатокот на кислород, нула гравитацијата, екстремните температури и космичката радијација, па дури и да се развиваат. Се очекува истражувањето да продолжи” , додава Соловјев.
