Експериментите вршени на глувци и на човечки клетки покажале постоење на протеин кој ја зголемува продукцијата на цитотоксичните – Т клетки кои ги убиваат клетките на ракот и клетките инфицирани со вируси. Откритието било неочекувано бидејќи протеинот не бил претходно познат и не наликувал на ниту еден друг протеин.
Истражувачите од Империјал Колеџ Лондон, кои го предводеле истражувањето, сега работат на развивање на генска терапија наменета за зајакнување на клетките кои се борат против инфекциите и се надеваат дека ќе започнат тестирања на луѓе за три години.
Во истрaжувањето кое се одвивало шест години, исто така учествувале и Универзитетот Квин Мери во Лондон, ЕТХ“ Цирих и Медицинската школа на Харвард, а наодите се објавени на 16-ти овој месец во списанието „Science“.
Цитотоксичните-Т клетки се важна компонента во одбранбениот систем, но кога ќе се соочат со сериозни инфекции и рак во напредна фаза не се во состојба да се зголемат во доволен број за да се спротивстават на болеста.
При скрининг на глувци со генетски мутации, истражувачите откриле вид на глувци кои продуцираат 10 пати повеќе цитотоксични –Т клетки кога се инфицирани со вирус, во споредба со нормалните глувци. Овие глувци многу поефикасно ја супримирале инфекцијата и биле многу поотпорни на рак. Тие исто така продуцирале и една подгрупа на Т-клетките – мемориски клетки, што им овозможувало да ја препознаат инфекцијата со која претходно се сретнале и да почнат брзо да реагираат.
Овие глувците со зголемен имунитет продуцирале високо ниво на досега непознат протеин, што истражувачите го нарекле „LEM“ (lymphocyte expansion molecule). Понатамошното истражување покажало дека LEM ја регулира пролиферацијата и на човечките Т-клетки исто како и кај глувците.
Истражувачите сега работат на развивање на генска терапија која ќе го подобри имунитетот преку зголемување на продукцијата на LEM. Следен чекор е терапијата да се тестира на глувци, да се види дали е безбедна и дали може да се комбинира со други терапии. Ако сѐ биде во ред, истражувачите се надеваат дека тестирањата на луѓе би можеле да започнат за околу три години.
„Клетките на ракот имаат начини да ја потиснат активноста на Т-клетките, што им помага да го избегнат имуниот систем. Генетската модификација на Т-клетките е цел подолго време и техники за нивна модификција веќе постојат. Ние се надеваме дека со воведување на активна верзија од LEM генот во Т-клетките кај заболените од рак, ќе им обезбедиме на пациентите многу поефикасен третман“- велат истражувачите.
