Кинески научници од Универзитетот „Sun Yat-sen“ во Гвангжу, направија модификација на геном од човечки ембрион. Овој труд беше објавен минатата недела во онлајн списанието „Protein & Cell“, што е невообичаено за истражување прво од ваков вид. Обично ваквите резултати се појавуваат на страниците на неколку респектибилни списанија како „Science“ или „Nature“.
Но, според зборовите на водачот на истражувањето Џунџуи Хуанг, нивното барање истражувањето да биде објавено во неколку списанија било одбиено од етички причини. Генетските модификации се етички многу дискутабилни, веројатно и опасни, па за да ги избегнат етичките забелешки, истражувачите користеле „неодржливи“ ембриони, односно ембриони од кои не може да се развие живот, кои биле земени од локална болница за оплодување.
Истражувачите направиле обид да го модифицираат генот одговорен за бета-таласемија, наследно пореметување на крвта, кое може да доведе до сериозна анемија. Идејата кај модификацијата на гените е да се направат специфични промени на одреден ген, со што ќе се коригира „грешката“. Хуанг и неговиот тим ја користеле техниката наречена „CRISPR/Cas9“, релативно нова, но многу моќна и широко распространета техника која на истражувачите им овозможува да ги модифицираат гените многу побрзо отколку порано. Во ембрионите се вбризгува ензимскиот комплекс „CRISPR/Cas9“, кој се врзува за ДНК на специфични локации. Комплексот може да биде програмиран да го таргетира проблематичниот ген, кој потоа се заменува или се „поправа“ од друга молекула која се внесува во исто време. Овој систем е добро проучуван кај клетки од возрасни луѓе и животински ембриони, но досега не постојат објавени извештаи за негова примена кај човечки ембрион.
Од 86-те ембриони што биле третирани, само кај четири била извршена успешна модификација. Останатите или не преживеале или не биле успешно модифицирани. Ова е далеку под нивото на ефикасност што е потребно за да може оваа генетска модификација да се применува кај луѓе. Покрај тоа, истражувачите откриле и други „нетаргетирани“ мутации, за кои се претпоставува дека се последица од влијанието на комлексот „CRISPR/Cas9“ на други делови од геномот. Овие ефекти, од безбедносен аспект, се главната причина за загриженост, бидејќи ваквите несакни мутации можат да бидат многу опасни.
И покрај сомнежите што ги изразуваат голем број на научници, малку е веројатно дека овие истражувања ќе престанат. Хуанг се надева дека со усовршување на техниката или со примена на друга техника, наречена „TALEN“ која е попрецизна, ќе се добијат помалку несакани мутации. Покрај тоа, неофицијално се смета дека и други научници во Кина работат на модификација на човечки ембриони. Но, дали треба да се продолжи со вакви истражувања? Некои научници сметаат дека е потребно да се даде повеќе време на научната заедница и на јавноста воопшто да го разгледа ова прашање и затоа е потребно од научниците да се побара доброволно да престанат со истражувањата.
