Птичјиот грип доведе до масовен колеж на милиони кокошки и мисирки, како и смрт на стотици луѓе.
Новиот метод за развој на вакцина се очекува да им помогне на научниците што побрзо да направат вакцина за птичјиот грип, со што би се намалил бројот и интензитетот на епидемии на живинарските фарми, како и заразување на човекот.
Јирген Рихт, професор по ветерина и директор на центарот за болести кај животните во САД, заедно со своите колеги, се фокусирале на еден подвид на птичјиот грип – “H5N1“ – кој е најактивен во Индонезија, Египет и други земји од југоизсточна Азија и северна Африка, а бил забележан и кај помал број на диви птици во САД.
“H5N1“ е патоген кој се пренесува од кокошките на луѓето. Досега повеќе од 700 луѓе во светот се заразиле, а околу 60 починале, изјави Рихт.
Истражувачите развиле вакцина за “H5N1“ преку комбинирање на два вируси. Тие го клонирале Њукастелскиот вирус и во неговата вакцина вметнале мал дел од “H5N1“ со што всушност создале рекомбинантен вирус. Кога ги вакцинирале кокошките со оваа вакцина, тие биле заштитени и од двата вируси.
Истражувачите исто така разгледале уште еден подвид на птичјиот грип – “H7N9“- кој е најзастапен во Кина. Пријавени се 650 случаи на заразени лица и 230 починати.
„За разлика од видот “H5N1“ кој ги убива птиците во рок од 3 до 5 дена, птиците заразени со “H7N9“ не покажуваат знаци на болест, што го зголемува ризикот од заразување“, велат истражувачите. Тие го употребиле истиот метод за да ја создадат вакцината и повторно се покажала ефикасна.
Користењето на Њукастелскиот вирус за да се создадат вакцините може да се покаже ефикасен не само за кокошките, туку и за свињите, говедата и овците, па следниот чекор на истражувачите е токму тоа. Истражувањето е објавено во „Journal of Virology“.
