Зошто мајчиното млеко е важно за луѓето?

На човечките бебиња повеќе им се потребни хранливите материи од мајчиното млеко, отколку на бебињата на едни од нивните најблиски роднини – мајмуните резуз макаки – според истражувањето објавено во „Journal of Proteome Research“, кое го споредува мајчиното млеко кај луѓето со она кај мајмуните резуз макаки.

Истражувачкиот тим предводен од страна на Универзитетот во Калифорнија, Дејвис, дојде до овој заклучок по развивањето на нова техника за споредување на сите протеини во човечкото мајчино млеко со она на мајмуните резус макаки, при што идентификува нови 524 протеини во човечкото мајчино млеко.

„Мајчиното млеко претставува рецепт за исхраната на луѓето во неонаталниот период, но се’ уште има многу работи кои не се познати за молекуларниот состав на млекото“, истакнуваат научниците.

За таа цел, тие развиле нова техника со која идентификувале 1.606 протеини во мајчиното млеко и 518 протеини во млекото кај мајмуните резус макаки. Тука се вклучени и 88-те протеини кои се заеднички за двата вида, но се на различно ниво, односно 93% од нив се наоѓаат во поголемо количество кај човечкото мајчино млеко. На пример, научниците откриле дека човечкото мајчино млеко содржи значително поголем број на протеини кои помагаат во варењето на масните соединенија, бавното варење на протеините и зголемувањето на апсорпцијата на железо, витамин Б-12 и витамин Д.

Ова се совпаѓа со воспоставеното гледиште дека луѓето се раѓаат во малку порана фаза на развој и им е потребна поголема количина на специфични протеини, во споредба со приматите.

Научниците сметаат дека овие наоди ќе овозможат подобро разбирање на составот на мајчиното млеко и ќе ги идентификуваат основните хранливи состојки кои треба да бидат вклучени во формулата за бебиња.