Археолози во Помпеја за првпат применија вештачка интелигенција за дигитална реконструкција на лицето на маж кој загинал при ерупцијата на Везув во 79 година од нашата ера. Проектот е развиен од Археолошкиот парк Помпеја во соработка со Универзитетот во Падова и се темели на податоци од ископувањата кај некрополата Порта Стабија.
Остатоците од мажот биле пронајдени заедно со уште едно лице, додека се обидувале да избегаат кон брегот. Истражувачите сметаат дека смртта настапила во рана фаза од катастрофата, кога врнеле вулкански камчиња и остатоци.
Кај жртвата биле откриени и предмети што зборуваат за неговите последни мигови: теракотен сад (толчник/аван), маслена ламба, мал железен прстен и десет бронзени монети. Археолозите толкуваат дека садот го користел како импровизирана заштита за главата додека се движел низ урнатините.
Дигиталниот портрет е изработен со комбинација од AI-алатки и фото-обработка, со цел скелетните и археолошките податоци да се претворат во реалистичен човечки лик. Според тимот, ваквиот пристап може да помогне огромните археолошки бази на податоци подобро да се анализираат, но и да се претстават поразбирливо за јавноста, без отстапување од научната основа.
Помпеја, која е под заштита на УНЕСКО, била затрупана со пепел и пемза пред речиси две илјади години. Токму таа трагедија денес овозможува исклучително детални увиди во секојдневниот живот, стравовите и одлуките на луѓето во последните часови пред уништувањето на градот.
