Еци, познат како Ледениот човек, не е само мумија стара околу 5.300 години. Ново истражување покажува дека неговото тело и денес носи сложена мешавина од древни и понови микроорганизми.
Научниците анализирале мраз од површината на мумијата, топена вода од внатрешноста на телото, брисеви, како и примероци од цревното ткиво и желудечната содржина. Со споредување на различни примероци успеале да разликуваат микроорганизми што биле дел од животот на Еци од оние што се населиле по неговата смрт.
Во цревата и желудникот биле пронајдени генетски траги од неговата оригинална цревна микробиота. Таа наликува на микробиомите на малкуте познати древни човечки популации, а дел од бактериите денес ретко се среќаваат кај луѓето во индустријализираните општества.
Најголемото изненадување било откривањето квасци приспособени на студ. Тие се пронајдени во примероци од кожата, топената вода и желудечната содржина, а генетски се сродни со соеви од екстремно студени средини, вклучувајќи ја и Антарктикот. Ова укажува дека најверојатно потекнуваат од ледникот и можеби останале поврзани со мумијата илјадници години.
Истражувачите откриле и силно распадната, древна ДНК и добро сочуван современ генетски материјал. Комбинацијата сугерира дека дел од микроорганизмите не се само остатоци од минатото, туку можеби сè уште опстојуваат во мирувачка состојба. Мумијата се чува на температура од -6 степени Целзиусови и релативна влажност од 99 проценти.
Можно е дел од квасците да се приспособиле и на средствата користени при конзервацијата. Три од четирите видови имаат гени што им овозможуваат разградување фенол — соединение што било употребено за отстранување габични наслаги од површината на мумијата.
Наодите, објавени во списанието Microbiome, ја претставуваат мумијата како динамичен биолошки систем, а не како целосно статичен археолошки остаток. Истражувањето може да помогне во подобрувањето на методите за заштита на ледничките мумии, но и да отвори можности за употреба на студољубиви микроорганизми во индустриски процеси, како што е ферментацијата на ниски температури.
