Вселенскиот телескоп „Хабл“ објави нова снимка од спиралната галаксија Месје 88, позната и како NGC 4501, која се наоѓа на околу 63 милиони светлосни години од Земјата, во соѕвездието Косата на Береника. На прв поглед, М88 изгледа како уредна и симетрична галаксија со јасно исцртани спирални краци, но нејзината иднина е далеку од мирна.
Во средиштето на М88 се наоѓа супермасивна црна дупка со маса приближно 100 милиони пати поголема од Сонцето. Околу неа има постари, поцрвени ѕвезди, а спиралните краци се исполнети со млади ѕвездени јата и облаци прашина. Галаксијата е активна, што значи дека нејзиното јадро сè уште влече гас и прашина, а дел од тој материјал се исфрла нанадвор.
М88 не патува сама. Таа е дел од јатото Девица, огромна гравитациски врзана структура со повеќе од илјада галаксии. Додека се движи кон внатрешните делови на јатото, во следните неколку стотици милиони години би можела да мине блиску до Месје 87, џиновската елиптична галаксија што доминира во центарот.
Токму тогаш ќе биде изложена на силен ефект познат како ram pressure stripping, при кој жешкиот гас меѓу галаксиите ја „издувува“ сопствената резерва гас од галаксијата. Астрономите веќе гледаат знаци дека овој процес почнал: гасниот диск на М88 изгледа скратен и збиен, а во надворешните делови има помалку студен гас од очекуваното. Тоа значи дека иднината на создавањето нови ѕвезди во М88 би можела значително да се промени.
Набљудувањето е дел од програмата на „Хабл“ насочена кон разбирање како спиралните галаксии еволуираат во густо населените космички средини. Благодарение на инструментот Wide Field Camera 3, истражувачите можат да ги следат поединечните ѕвездени јата и маглини во галаксии од ваква оддалеченост и подобро да ја разберат врската меѓу околината и раѓањето на ѕвездите.
