Идеја замислена во 1775 година конечно доби физички облик: двајца студенти по инженерство од Универзитетот во Мелбурн изработија механички уред што ја прикажува ерупцијата на Везув со светлина, движење и внимателно скриени механизми.
Проектот се темели на концепт на сер Вилијам Хамилтон, британски дипломат во Неапол и Сицилија и голем познавач на вулканите. Неговата замисла била да се спојат уметноста и механиката за да се долови драматиката на лавата и експлозивната сила на вулканската ерупција.
Современата реконструкција е инспирирана од акварелот на Пјетро Фабрис од 1771 година, како и од зачуван цртеж што денес се наоѓа во Општинската библиотека во Бордо. Не е сигурно дали Хамилтон некогаш го изградил уредот, но неговиот дизајн послужил како основа за новата верзија.
Студентите Ксинју Сју и Јуџи Зенг работеле три месеци во студентската работилница The Creator Space. Наместо часовничарски механизам, тие употребиле ласерски сечено дрво и акрил, програмабилно LED-осветлување, 3Д-печатење и електронски контролни системи.
Предизвикот не бил само технички, туку и визуелен: светлината требало да изгледа како блескава лава, додека механизмите да останат невидливи за гледачот. Според тимот, токму тоа ја направило реконструкцијата вредна лекција по практично инженерство, програмирање, лемење и решавање проблеми.
Завршениот уред е поставен како централен експонат на изложбата The Grand Tour во библиотеката Baillieu на Универзитетот во Мелбурн, каде што ќе биде изложен до 28 јуни 2026 година.
За љубопитноста што нè поврзува.
Вашата донација помага науката да стигне до повеќе читатели.
Ви благодариме што ја поддржувате науката на македонски.
