Меѓународен тим предводен од Техничкиот универзитет на Данска (DTU) разви нов магнетен материјал што комбинира силен внатрешен магнетен ред со речиси незабележливо надворешно магнетно поле. Според објавата во списанието Nature Chemistry, материјалот ја задржува оваа рамнотежа и на температури повисоки од собната, што е реткост кај вакви системи.
Станува збор за компензиран феримагнет, класа материјали кај кои магнетните моменти се насочени во различни правци и меѓусебно речиси се поништуваат. Тоа значи дека материјалот внатрешно останува магнетен, но однадвор создава многу слабо поле. Токму оваа особина може да ја намали магнетната „шумност“ што денес им пречи на густо спакуваните електронски компоненти.
Новиот систем е метално-органска мрежа Cr(pyrazine)3: хромови центри поврзани со органски молекули пирaзин. Во овој случај, пирaзинот се однесува како радикал со неспарен електрон и директно учествува во магнетизмот. За разлика од класичните легури и оксиди, ваквата архитектура им овозможува на истражувачите хемиски да ги „подесуваат“ магнетните и потенцијално електронските својства.
Откритието е особено релевантно за спинтрониката, каде информацијата се кодира преку спинот на електроните, а не само преку електричен полнеж. Во теорија, тоа може да донесе побрзи и поштедливи уреди. Ако материјали со вакво ниско надворешно поле навистина се интегрираат во компоненти, можно е елементите да се поставуваат погусто без меѓусебни пречки.
Авторите нагласуваат дека станува збор за фундаментално истражување, а не за готова технологија. Следните чекори се проверка на електричната спроводливост, дополнително хемиско прилагодување и изработка на тенки филмови погодни за реални електронски уреди.
