По успешното прелетување покрај Марс, леталото „Psyche“ на НАСА започна речиси непрекинато забрзување кон истоимениот астероид во главниот астероиден појас. Пристигнувањето е планирано за летото 2029 година.
„Psyche“ користи соларно-електричен погон со Холoви потисници. Тие ги забрзуваат јоните на ксенонот со електромагнетно поле, создавајќи мал, но постојан потисок. Секој потисник произведува до 250 милињутони сила — приближно колку тежината на една батерија АА во рака.
Иако потисокот е слаб во споредба со конвенционалните ракетни мотори, тој се собира со текот на времето. Во текот на патувањето леталото ќе достигне брзина поголема од 160.000 километри на час во однос на Земјата. Од четирите потисници се користи по еден, а системот може да работи речиси 90 отсто од времето.
Енергијата ја обезбедуваат две големи соларни низи со вкупна површина од околу 75 квадратни метри. Леталото полетало со приближно 1.090 килограми ксенон, од кои досега потрошило околу една третина. Бидејќи интензитетот на сончевата светлина опаѓа со оддалечувањето од Сонцето, инженерите постепено ќе ја намалуваат моќноста на погонот.
Работењето на Холoвите потисници создава и многу мал вртежен момент поради спиралното движење на јоните. За да го одржат правилното насочување, инженерите ги користат реакциските тркала, а периодично го исклучуваат погонот и го коригираат насобраниот аголен момент. Ова ѝ овозможува на мисијата директно во вселената да го проучува ефектот.
Кога ќе пристигне до астероидот, „Psyche“ ќе влезе во орбита и во текот на главната двегодишна научна мисија ќе ја мапира неговата површина и ќе го истражува составот. Астероидот е широк околу 280 километри и можеби претставува дел од металното јадро на древен планетезимал.
Ако оваа претпоставка се потврди, „Psyche“ би можел да понуди уникатен увид во внатрешноста на карпестите планети, вклучувајќи ја и Земјата.
