Полиетиленот, една од најчесто користените пластики во амбалажата за храна и пијалаци, можеби не е толку биолошки безопасен како што се сметаше. Истражување на научници од Универзитетот „Texas A&M;“ покажува дека честичките од оваа пластика можат да придонесат за развој на замастен црн дроб.
Истражувачите утврдиле дека изложеноста на полиетиленски микропластики ги зголемила показателите за замастување на црниот дроб дури и без дополнителен ризик од нездрава исхрана. Кога изложеноста била комбинирана со исхрана богата со масти, фруктоза и холестерол, промените биле поизразени.
Замастениот црн дроб се јавува кога во клетките на органот се наталожува прекумерна количина маснотии. Состојбата засега влијае врз околу една четвртина од светското население, а новите резултати укажуваат дека влијанието на животната средина можеби дополнително го засилува ризикот поврзан со исхраната.
За да откријат како настануваат промените, научниците користеле просторна транскриптомика — техника што овозможува да се следи активноста на гените, но и точното место во ткивото каде што се случуваат промените. Така биле издвоени области на оштетување и молекуларни патишта поврзани со реакцијата на црниот дроб кон микропластиките.
Особено внимание привлекол протеинот PPAR-алфа, кој учествува во регулирањето на метаболизмот на мастите во црниот дроб. Истражувањето го поврзало и генот ANXA2, кој има улога во обновувањето на ткивото, со процесите што можат да придонесат за оштетување.
Научниците нагласуваат дека резултатите не се доказ оти секојдневната изложеност кај луѓето директно предизвикува заболување. Потребни се дополнителни истражувања за да се утврди како експерименталните наоди се однесуваат на реалните нивоа на изложеност и дали полиетиленот може да придонесе и за потешки состојби, како фиброза на црниот дроб.
