Вселенското летало „Psyche“ на НАСА успешно го прелета Марс, користејќи ја неговата гравитација за да ја зголеми брзината и да ја коригира траекторијата кон истоимениот метално богат астероид. Средбата, која се случи на 15 мај, ја постави мисијата на пат кон астероидот „Psyche“, каде што треба да пристигне во 2029 година.
Прелетувањето беше и важен тест за научните инструменти на леталото. Камерите, магнетометарот и спектрометарот за гама-зраци и неутрони работеа успешно, а податоците се споредуваат со мерења од други орбитери и ровери што го истражувале Марс.
Спектрометарот регистрирал зголемен број неутрони што потекнуваат од површината и атмосферата на Марс. Леталото поминало на околу 4.609 километри од планетата — преголема далечина за откривање на гама-зраци, но доволна за инструментот да покаже дека е подготвен за идното проучување на составот на астероидот „Psyche“.
Магнетометарот, пак, за првпат измерил магнетен потпис на небесно тело. При приближувањето кон Марс го регистрирал наглото засилување на магнетното поле во областа на ударниот бран, каде што сончевиот ветер се судира со магнетната околина на планетата.
Камерите на „Psyche“ снимиле Марс од необичен агол. Планетата најпрво се појавила како тесен, светол срп поради расејувањето на сончевата светлина во атмосферата. Како што леталото се приближувало, камерите забележале детали на површината, вклучувајќи кратери обликувани од ветерот, јужната поларна ледена капа и големиот двоен кратер Хајгенс.
Од снимките направени во текот на еден месец е составено забрзано видео што го прикажува приближувањето и оддалечувањето на леталото. Камерите ги забележале и малите марсови месечини Фобос и Дејмос, што претставува проба за идното пребарување на можни мали сателити околу астероидот „Psyche“.
По успешниот гравитациски маневар, „Psyche“ продолжува кон главниот астероиден појас меѓу Марс и Јупитер. Таму мисијата ќе истражува необичен објект богат со метали, кој можеби претставува изложено јадро на древно планетарно тело.
