Гледањето телевизија многу често во средните години е поврзано со помал волумен на одредени мозочни региони и со повеќе знаци на оштетување на белата мозочна маса во подоцнежниот живот, покажува ново истражување.
Научниците анализирале податоци од околу 1.700 возрасни лица, со просечна возраст од 53 години, кои биле следени повеќе од две децении. Учесниците пријавиле колку често гледале телевизија во слободното време, а подоцна биле подложени на магнетна резонанца на мозокот.
Лицата што рекле дека гледаат телевизија „многу често“ имале помал волумен во области поврзани со меморијата, донесувањето одлуки и визуелната обработка. Кај нив биле забележани и поголеми промени во белата мозочна маса, кои се поврзуваат со болести на малите крвни садови, когнитивно опаѓање и деменција.
Интересно е што самото седење не се покажало како главниот проблем. Луѓето што поголем дел од работниот ден го минувале седејќи на интелектуално стимулирачки работни места имале поповолни мозочни показатели од оние што времето го поминувале пред телевизор.
Според истражувачите, решавањето проблеми, концентрацијата и менталната активност можеби го менуваат влијанието на седењето врз мозокот. Анализата ги земала предвид и физичката активност, дијабетесот, телесната тежина, пушењето и консумирањето алкохол.
Промените биле поизразени кај мажите, но потребни се дополнителни истражувања за да се утврди зошто постои оваа разлика. Авторите нагласуваат дека резултатите покажуваат поврзаност, а не докажуваат дека телевизијата директно предизвикува структурни оштетувања на мозокот.
Истражувањето, објавено во списанието „Alzheimer’s & Dementia“, укажува дека здравствените препораки можеби треба да се однесуваат не само на времето поминато во седење, туку и на активноста што се извршува во тој период.
