Вселенските телескопи Хабл и Џејмс Веб заеднички ги проучуваа едни од најоддалечените тела во Сончевиот систем – транснептунските објекти, кои орбитираат подалеку од Нептун. Истражувањето опфати 27 исклучително бледи и мали објекти, меѓу кои и некои од најмалите досега директно набљудувани.
Транснептунските објекти се ледени остатоци од раната фаза на создавањето на планетите. Тие настанале од прашина и камчиња што се спојувале во планетезимали – градбени единици со големина на градови – но никогаш не прераснале во големи светови. Повеќето се повеќе од 100 милиони пати побледи од објектите видливи со голо око.
Хабл ги регистрирал во видлива светлина, додека Веб ги набљудувал во инфрацрвениот дел од спектарот. Така научниците ги измериле нивните бои, големини и орбити. Бојата служи како своевиден отпечаток на составот на површината.
Истражувачите разгледале две популации. Таканаречените динамички студени објекти се движат по релативно кружни орбити и најверојатно останале блиску до местото каде што се создале. Динамичките жешки објекти потекнуваат од пределот меѓу Уран и Нептун, но во раната историја на Сончевиот систем биле исфрлени кон периферијата.
Научниците очекувале честите судири да ги изменат површините на малите тела, но набљудувањата покажале нешто неочекувано. Нивните бои и состави се совпаѓаат со оние на поголемите објекти од истите популации. Тоа укажува дека судирите можеби се поретки од предвиденото или дека овие ледени тела ги зачувале своите првични својства.
Сличноста се забележува и во распределбата на големините. Иако двете популации се создале во различни услови, нивниот број по големина е речиси ист. Сепак, Веб открил помалку многу мали тела отколку што предвидуваат некои модели на формирање планети.
Најмалото набљудувано тело има дијаметар од околу пет километри – големина недостижна за најчувствителните телескопи на Земјата. Комбинацијата на видливите и инфрацрвените набљудувања им овозможува на научниците подобро да ја реконструираат раната историја на Сончевиот систем и да разберат како настанале неговите најмали градбени единици.
