Големите јазични модели почесто ги поддржуваат политиките што веќе се применуваат отколку новите предлози, покажува студија на истражувачи од Универзитетот Ватерлу. Оваа пристрасност кон статус-кво може да го отежне донесувањето одлуки потребни за побрзо справување со климатските промени.
Истражувачите испитувале 11 големи јазични модели преку повеќе од 7.500 прашања од различни области, меѓу кои купување автомобили, рецепти, греење на домовите и климатски политики. Вкупно биле анализирани речиси 55.000 прашања и одговори.
Разликата била најизразена кај политичките одлуки. Кога моделите биле прашани дали треба да продолжи план што веќе е во сила, одговорот бил позитивен во 70 отсто од случаите. Кај новите планови и политики, поддршката паднала на 34 отсто.
Сличен образец бил забележан и кај препораките за електрични возила. Моделите ги земале предвид регионалните разлики, па почесто препорачувале електрично возило за корисник од Норвешка отколку за корисник од Канада. Сепак, во двата случаи препораките биле поретки од реалниот удел на електричните возила во продажбата во тие земји.
Според истражувачите, ваквото однесување можеби произлегува од тоа што моделите се потпираат на постојните обрасци и најчестите совети. Тоа може да биде корисно во области каде што е важно да се следат докажани практики, но е проблематично кога климатските цели бараат брзи промени.
„Овие модели, вклучително и поновите, имаат свои слепи точки“, вели Сет Винс од Универзитетот Ватерлу. Тој советува корисниците намерно да побараат од чет-ботот да ги разгледа аргументите за ново решение, наместо само да го прифатат првиот предлог.
Студијата „Large language models exhibit status quo bias in climate-relevant advice“ е објавена во списанието Environmental Research Communications. Истражувачите планираат да следат како ќе се менуваат овие пристрасности и дали директното користење на вештачката интелигенција за купување и други одлуки ќе го засили нивното влијание.
