Истражување на речиси 2.800 производи наменети за деца од 6 до 36 месеци покажало дека 81 отсто од нив се ултрапреработени. Речиси половина од производите не исполнувале барем еден нутритивен критериум на Светската здравствена организација.
Истражувачите ги анализирале производите изложени во деловите за бебиња и мали деца во 21 продавница во Остин, Тексас. Во анализата не биле вклучени адаптирано млеко, пијалаци и пиреа што најчесто се даваат како прва храна.
Според резултатите, 17 отсто од производите не ги исполнувале препораките за шеќер, 25 отсто содржеле премногу натриум, 11 отсто не го исполнувале стандардот за масти, а 12 отсто имале несоодветна енергетска густина.
Како проблематични примери се издвојуваат овошните кашички во кесички поради високата количина шеќер, овесните плочки поради шеќерот и калориите, како и макароните со сирење, сувомеснатите стапчиња и различните „пуф“ грицки поради високото количество натриум, масти или калории.
Научниците нагласуваат дека поголемата количина масти или калории сама по себе не значи дека производот е нездрав. Помалку преработената храна може да содржи хранливи состојки, како кикиритки или месо. Кај ултрапреработените производи, сепак, почесто се забележувале високи количини шеќер без соодветна хранлива вредност.
Изборот на храна во најраните години може да влијае врз вкусовите и навиките што децата ќе ги развијат подоцна. Затоа истражувачите сметаат дека појасните декларации и предупредувањата на предната страна од пакувањето би им помогнале на родителите полесно да ги препознаат производите со неповолен нутритивен состав.
Наодите биле претставени на конференцијата NUTRITION 2026 и сè уште не поминале целосна рецензија за научно списание. Истражувањето ги опфаќа само пакуваните производи од продавниците, па резултатите не го прикажуваат целокупниот начин на исхрана на децата дома.
