Канадскиот астронаут Џереми Хансен, еден од членовите на историската мисија Artemis 2, во септември ќе се повлече од активната астронаутска служба. Веста доаѓа само неколку месеци по неговиот лет околу Месечината во април 2026 година, со што Хансен стана еден од најпрепознатливите симболи на новата фаза во меѓународното истражување на длабоката вселена.
Хансен соопшти дека неговото заминување од активната служба не значи и напуштање на вселенскиот сектор. Напротив, тој ќе продолжи како резервист, со намера да придонесе во клучните канадски активности поврзани со вселената, вклучувајќи технолошки развој, иновации и поддршка на националните капацитети во оваа област.
Во својата кариера Хансен помина 17 години како астронаут на Канадската вселенска агенција, а пред тоа служеше и како офицер и пилот во Кралските канадски воздухопловни сили. Иако беше избран во астронаутскиот корпус уште во 2009 година, својата прва вселенска мисија ја доби дури во 2023, кога беше објавен екипажот на Artemis 2. Тоа долго чекање е поврзано и со ограничениот број летови што Канада ги добива преку своето учество во Меѓународната вселенска станица.
Покрај летачкото искуство, Хансен имаше и важни улоги зад сцената. Работеше на развој на алатки и процедури за сложени операции на Меѓународната вселенска станица, а бил и вклучен во организацијата на обуката за нови генерации астронаути во НАСА. Во изминатите години, тој стана и значаен претставник на канадско-американската соработка во вселената, често учествувајќи на високо политичко и дипломатско ниво.
Мисијата Artemis 2 има посебно значење и за Канада. Благодарение на нејзиното учество во програмата Artemis и на придонесот во роботските системи, земјата обезбеди места за свои астронаути во идни лунарни мисии. Токму затоа летот на Хансен беше доживеан не само како личен успех, туку и како потврда дека Канада носи реална вредност во меѓународните вселенски програми.
Неговото повлекување од активната служба означува крај на една важна етапа, но не и крај на неговото влијание. Ако се суди според пораките што ги испрати, Хансен останува цврсто насочен кон иднината на канадската вселенска индустрија и кон пошироката идеја дека истражувањето на вселената е извор и на научен напредок и на економски развој.
