Кучињата и вештачката интелигенција во потрага по рак

Во близина на индискиот град Бенгалуру, истражувачи обучуваат кучиња да препознаваат можни знаци на рак во примероци од човечкиот здив, додека вештачката интелигенција ги анализира нивните реакции.

Иницијативата ја развива стартапот Dognosis. Кучињата носат специјално изработени шлемови и опрема со сензори што ја следат нивната мозочна активност, дишењето и однесувањето при мирисање на примероците. Еден час тие можат да направат илјадници проценки.

Методот е неинвазивен: пациентот дише околу десет минути во памучна маска, која потоа се запечатува и се испраќа во лабораторија. Пациентите немаат директен контакт со кучињата.

Истражувањето на Dognosis опфатило повеќе од 1.500 учесници во шест болници во индиската сојузна држава Карнатака. Компанијата известува за точност над 90 проценти при испитување на седум главни видови рак, но резултатите сè уште треба да се потврдат со поголеми студии и тестирања во реални услови.

Научниците сметаат дека болестите можат да го променат составот на хемикалиите што ги ослободува човечкото тело, создавајќи специфични мириси. Кучињата имаат околу 300 милиони рецептори за мирис, во споредба со приближно пет милиони кај луѓето.

Онколозите ја оценуваат идејата како ветувачка, но предупредуваат дека сè уште не може да се користи како конечна дијагноза. Доколку биде потврдена, технологијата би можела да служи како достапен прв скрининг, по кој сомнителните случаи би се упатувале на стандардни медицински испитувања.