Летечки автономен робот со помош на вештачка интелигенција препознава и бере зрело овошје

Берењето овошје е физички напорна работа што бара многу стоење, клечење или качување по дрвјата, а понекогаш таа физичка активност трае до осум или повеќе часа на ден. Иако има свои добри страни, оваа работа генерално е ниско платена или сезонска во која има многу малку простор за напредување. Бидејќи помладите генерации сè повеќе мигрираат во урбаните области, а пандемијата на коронавирусот го ограничува патувањето и спречува доаѓање на сезонски работници од други земји, роботите стануваат сè почесто решение.

Компанијата Aerobotics Technologies разви летечки автономен робот (FAR) кој користи вештачка интелигенција (AI) за препознавање и берење овошје. Компанијата наведува дека нивните автономни летачки роботи можат да се користат насекаде во светот и дека тие го решаваат проблемот со недостиг на работна сила, истовремено намалувајќи ги трошоците, пишува „Интерес инженеринг“.

Роботот FAR користи алгоритми за перцепција на AI за лоцирање на дрвја и алгоритми за визија за откривање на овошје меѓу лисјата. При берење овошје, времето е исклучително важно, па на пример, овошјето собрано со две недели задоцнување губи 80% од својата вредност. Роботите берат само зрело овошје и го класифицираат според големината и зрелоста. Откако ќе го избере овошјето, роботот го наоѓа најдобриот начин да му пријде, а потоа користи штипка за да го фати и да го собере.

На еден овоштарник можат да работат повеќе роботи без ризик да се допрат меѓусебно бидејќи ги контролира автономен дигитален мозок. Исто така предноста од користење на ваквите роботи е фактот што тие можат да работат и 24 часа дневно.

Од компанијата истакнуваат дека роботите не се замена за човечки берачи на овошје, туку се дизајнирани за да послужат како помош во ситуации кога човечка рака не може да постигне да го собере зрелиот плод.