Вселенското летало Psyche на НАСА успешно го прелета Марс на 15 мај 2026 година, користејќи ја неговата гравитација за да ја зголеми брзината и малку да ја промени траекторијата кон истоимениот астероид. Средбата беше важна и за проверка на научните инструменти пред пристигнувањето до астероидот Psyche во 2029 година.
За време на прелетот, леталото собра податоци со мултиспектралната камера, магнетометарот и спектрометарот за гама-зрачење и неутрони. Иако прелетот се одвиваше на височина од 4.609 километри, спектрометарот регистрираше зголемен број неутрони што потекнуваат од површината и атмосферата на Марс. Гама-зрачење не било забележано, што било очекувано поради големата оддалеченост.
Магнетометарот за првпат измери магнетен потпис на небесно тело. При приближувањето до Марс, инструментот го регистрирал интензивното зголемување на магнетното поле во областа на ударниот бран, каде што сончевиот ветер се судира со магнетното поле на планетата.
Камерите на Psyche направиле снимки на Марс од различни агли и во повеќе бранови должини. На нив се гледаат поларната ледена капа, кратери обликувани од ветерот и големиот кратер Хујгенс, а тимот успеал да ги забележи и месечините Фобос и Дејмос. Снимките се составени во временски забрзано видео што го прикажува приближувањето, прелетот и оддалечувањето од Црвената Планета.
Научниците ќе ги користат резултатите за дополнителна калибрација на опремата и подготовка за истражувањето на астероидот Psyche, кој се наоѓа во главниот астероиден појас меѓу Марс и Јупитер. Леталото е во добра состојба и според планот треба повторно да продолжи со долготрајно придвижување со соларно-електричен погон.
