Редок небесен спектакл ги очекува гледачите на ѕвездите во наредните недели, кога кометата А3 (Цучиншан-АТЛАС) ќе се појави на небото. Иако некои веќе ја нарекоа „комета на векот“, астрономите како што е д-р Роберт Меси од британското Кралско астрономско друштво изразуваат внимателен оптимизам.
„Сите сме навистина возбудени поради појавата на кометата А3 (Цучиншан-АТЛАС) и како таа би можела да биде убав светол објект на ноќното небо“, изјави Меси за Phys.org.
Откриена во јануари 2023 година, кометата го добила името по двете опсерватории кои први ја забележале, кинеската опсерваторија Цучиншан и јужноафриканската опсерваторија АТЛАС. Оваа извонредна комета, која доаѓа од Ортовиот облак на работ на Сончевиот систем и ја посетува внатрешноста на Сончевиот систем приближно на секои 80.000 години, последен пат ја помина Земјата кога неандерталците сè уште талкаа на нашата планета.
Видлива до крајот на октомври
За оние кои живеат на северната хемисфера на Земјата, кометата ќе биде видлива во два клучни периоди. Првото набљудување, кое всушност веќе помина, беше можно помеѓу 27 септември и 2 октомври, непосредно пред изгрејсонце на исток. Друга и потенцијално подобра можност се јавува од 12 до 30 октомври, веднаш по заоѓањето на сонцето на запад. Набљудувањето на таа комета, сепак, може да бара добар двоглед или телескоп.
Мислам дека ќе ви треба двоглед за да го забележите, или телескоп ако имате… Но кој знае, можеби ќе биде видлив со голо око, рече Меси.
