Научници открија дека ноќните изблици на хормони можат да укажат на честа, но тешко забележлива причина за висок крвен притисок – примарниот алдостеронизам.
Во ова нарушување, надбубрежните жлезди произведуваат премногу алдостерон, хормон што го регулира балансот на солта и водата во организмот. Состојбата може да го зголеми ризикот од срцеви заболувања, мозочен удар и дијабетес, а според истражувачите може да засега до една од пет лица со хипертензија.
Студијата, објавена во списанието Science Translational Medicine, опфати 60 пациенти од Бристол, Берген, Стокхолм и Атина. Тие 24 часа носеле лесен уред поставен околу половината, кој на секои 20 минути ги следел нивоата на хормони преку примероци од кожата.
Мониторингот во домашни услови открил дека кај пациентите со примарен алдостеронизам алдостеронот не е постојано покачен, туку се ослободува во повторливи, особено изразени бранови во текот на ноќта. Бидејќи рутинските крвни анализи најчесто се земаат во текот на денот и во една временска точка, тие можат да го пропуштат нарушувањето.
Истражувачите ги следеле и сродните хормони 18-хидроксикортизол и 18-оксокортизол. Ноќните промени биле најзабележливи кај луѓето кај кои проблемот потекнувал од само една надбубрежна жлезда, а исчезнале по хируршкото отстранување на засегнатата жлезда.
Резултатите се прелиминарни, но укажуваат дека идната дијагностика би можела да се потпира повеќе на следење на хормонските ритми во текот на 24 часа, наместо само на еднократен крвен тест. Бидејќи примарниот алдостеронизам може да се лекува, а во одредени случаи и да се излечи, пораното откривање би можело да спречи дел од кардиоваскуларните компликации.
