НАСА планира денес, на 1 април, од Вселенскиот центар „Кенеди“ во Флорида да ја лансира мисијата „Артемис 2“, еден од најзначајните чекори во современото човечко истражување на вселената. Полетувањето е закажано за 18:24 часот по источно американско време.
Со помош на ракетата Space Launch System (SLS), мисијата треба да испрати четворица астронаути на десетдневно патување околу Месечината и назад кон Земјата, во капсулата „Орион“. Екипажот го сочинуваат астронаутите на НАСА Рид Вајзман, Виктор Гловер и Кристина Кох, како и канадскиот астронаут Џереми Хансен.
Ако летот се реализира според планот, тоа ќе биде првпат луѓе да патуваат надвор од ниската орбита на Земјата по мисијата „Аполо 17“ во декември 1972 година. Воедно, „Артемис 2“ има и историско општествено значење: Виктор Гловер би станал првиот човек со афроамериканско потекло, Кристина Кох првата жена, а Џереми Хансен првиот неамериканец што патувале подалеку од ниската орбита на Земјата.
„Артемис 2“ е втората мисија во пошироката програма „Артемис“, со која НАСА сака повторно да воспостави човечко присуство во близина на Месечината. Првата мисија, „Артемис 1“, на крајот на 2022 година испрати беспилотна капсула „Орион“ во орбита околу Месечината и успешно ја врати на Земјата.
Како и својот претходник, и оваа мисија е пред сè тест-лет. Нејзината цел е да покаже дека „Орион“ може безбедно да поддржи астронаути за подолг престој во длабоката вселена. Воедно, ова ќе биде првиот лет на капсулата со екипаж и нејзин вкупно трет лет во вселената, по тестот во земјина орбита во 2014 година и „Артемис 1“.
НАСА ја гледа оваа мисија како подготовка за уште поамбициозни чекори во наредните години. Плановите вклучуваат тестирање на можноста „Орион“ да се спои со идните летала за слетување на Месечината, како „Старшип“ на SpaceX и „Blue Moon“ на Blue Origin, а потоа и испраќање астронаути во близина на јужниот пол на Месечината. Долгорочната цел е изградба на одржливо присуство таму и стекнување знаења за идни мисии кон Марс.
Токму тука лежи и клучната разлика во однос на ерата „Аполо“. Додека во 1960-тите и 1970-тите главната цел беше геополитичка победа во трката со Советскиот Сојуз, програмата „Артемис“ е замислена како инфраструктура за подолгорочно човечко присуство и работа далеку од Земјата.
Затоа, иако денешното лансирање за многумина ќе потсети на славните денови на „Аполо“, неговото вистинско значење е насочено кон иднината: отворање пат кон подлабоко и поодржливо истражување на вселената.
