Потенцијален нов третман за рак на јајниците и колоректален карцином даде импресивни резултати – искоренување на болеста во напредна фаза кај животните за само шест дена.
Новата терапија досега е тестирана само на глувци. Сепак, раните знаци се ветувачки, а клиничките испитувања кај луѓето би можеле да започнат до крајот на годината.
Третманот вклучува ситни зрнца, импланти кои се ставаат во телото и испорачуваат континуирана, висока доза на интерлеукин-2 (IL2) – природно соединение кое ги вклучува белите крвни зрнца во борбата против ракот.
„Ние ги даваме само еднаш, но тие продолжуваат да ја земаат дозата секој ден, додека не се елиминира ракот“, вели Омид Вајсех, биоинженер од Универзитетот Рајс во Тексас.
„Откако утврдивме колку точно дози се потребни, успеавме да ги искорениме туморите кај 100 проценти од животните со рак на јајниците и кај седум од осум животни со колоректален карцином“, вели Вајсех.
Интерлеукин-2 е еден од групата на протеини кои го активираат имунолошкиот систем да создава супстанци наречени цитокини. Иако цитокините веќе се користат за лекување на меланом и рак на бубрезите, проблемот што го имаат научниците е да ги принудат цитокините ефикасно да се борат против туморите, додека избегнуваат опасно високи нивоа на воспаление на друго место во телото, предизвикувајќи драматични несакани ефекти.
Во оваа студија, зрната беа поставени во перитонеумот, обвивка слична на вреќичка околу цревата, јајниците и другите абдоминални органи. Ова им овозможува на лековите конкретно да го таргетираат ракот без да го оптоваруваат телото во однос на волуменот или тежината.
Дозата на интерлеукин-2 дадена од овие импланти би била премногу токсична доколку се администрира интравенски, но таа функционира овде бидејќи високите концентрации се фокусирани на туморот.
Покрај тоа, лековите што се користат овде веќе се одобрени како безбедни за употреба во клинички испитувања, што треба да го забрза процесот. Конечниот третман треба да биде минимално инвазивен и релативно лесен за примена.
