13-годишно момче измисли нов уред за детектирање на алкохол и дрога кај возачите

Сообраќајните несреќи како последица на пиењето, односно на возењето под дејство на алкохол се се’ почести, одземајќи човечки животи речиси секој ден.

Кришна Реди, 13-годишно момче од Тексас, со цел да го спречи тоа, измисли нов уред која препознава дали возачот конзумирал алкохол или дрога врз основа на проширувањето на зениците.

Алкотестовите, кои го мерат количеството на алкохол преку здивот, можат да детектираат кога некој конзумирал алкохол, но не и дрога. И за истите да се направат е потребна согласност на возачот. Реди сакал да создаде нешто подобро од тоа.

Нашите зеници се стеснуваат за да го филтрираат количеството на светлина што влегува во очите. Кога гледаме во светла точка – зениците стануваат помали; кога гледаме во темница – тие стануваат поголеми, односно се шират. Истото се случува и кога конзумираме алкохол или дрога, односно алкохолот и други одредени опијати предизвикуваат зениците да се стеснат, додека кокаинот, ЛСД и печурките предизвикуваат да се шират.

Со искористување на овој ефект, Реди го направил уредот користејќи дигитална камера, светилка и картон од тоалетна хартија во ролна. Уредот функционира на тој начин што светилката свети во окото, а ролната ја насочува светлината директно кон зеницата. Потоа, дигиталната камера ја снима зеницата и со помош на софтверска програма (која исто така ја создал Реди) уредот го мери контрахирањето на зеницата, што со голо око понекогаш не може да се забележи.

Може да се користи за да открие дали некој конзумирал алкохол, марихуана, амфетамини, одредени лекови против болка или апчиња за спиење.

Кришна Реди беше еден од 10-те финалисти на минатогодишниот натпревар за Најдобриот млад научник на Америка и парична награда од 25 илјади долари.