Учениците што се чувствуваат поврзани со своето училиште и имаат добри односи со наставниците поретко развиваат емоционални тешкотии и почесто доаѓаат на настава, покажува нова студија од Универзитетот во Манчестер.
Истражувањето, објавено во Journal of the American Academy of Child & Adolescent Psychiatry, следело повеќе од 25.000 ученици од 154 средни училишта во Англија, на возраст од 12/13 до 14/15 години. Анализата комбинирала податоци за присуство на настава и тригодишни резултати од програмата #BeeWell.
Наодите покажуваат двонасочна врска: кога се зголемуваат емоционалните тешкотии, во следниот период опаѓа чувството на припадност и квалитетот на односите со училишниот кадар. Кај дел од учениците, особено кај девојчињата, тоа е поврзано и со поголеми отсуства од училиште.
Во спротивна насока, позитивните училишни искуства делуваат заштитно. Посилната поврзаност со училиштето и поддржувачките односи со возрасните во него се поврзани со помалку грижи, понизок пад на расположението и подобро присуство на часови. Кај момчињата, клучни се односите со наставниците, а кај девојчињата особено важен е чувството на припадност кон училишната заедница.
Истражувачите нагласуваат дека само подобрувањето на присуството не е доволно за да се подобри менталното здравје. Наместо тоа, училиштата треба да се фокусираат и на тоа како учениците се чувствуваат во секојдневието: дали се забележани, поддржани и прифатени. Според авторите, токму тие искуства можат рано да спречат отуѓување и да помогнат кога се појавуваат првите знаци на емоционални тешкотии.
За љубопитноста што нè поврзува.
Вашата донација помага науката да стигне до повеќе читатели.
Ви благодариме што ја поддржувате науката на македонски.




























