Практичните активности и разговорите за наука, технологија, инженерство и математика во семејството, училиштето и заедницата можат значително да влијаат врз идните кариерни избори на младите.
Ова го покажува студија на истражувачи од Универзитетот „Флорида интернешнл“, објавена во International Journal of STEM Education. Во истражувањето биле опфатени 15.725 студенти од прва година на 119 високообразовни институции во САД.
Истражувачите ја анализирале поврзаноста меѓу уживањето во STEM-предметите, желбата да им се помага на другите и намерите за избор на STEM-кариера. Врз основа на овие фактори, студентите биле поделени во три групи: лидери, научници и помагачи.
Студентите кои истовремено уживале во STEM и сакале преку својата работа да им користат на другите, во просек покажале најголем интерес и задоволство од овие области. Сепак, во целокупниот примерок, студентите со посилна општа ориентација кон помагање биле нешто помалку склони да планираат STEM-кариера.
Меѓу студентите кои веќе размислувале за кариера во STEM, околу две третини рекле дека желбата да им помагаат на другите е важен дел од нивната мотивација. Според авторите, ова покажува дека младите не секогаш ја препознаваат општествената корист од STEM-професиите.
Родителите и наставниците можат да помогнат со тоа што ќе им покажат на учениците како научниците, инженерите и технолозите придонесуваат за решавање глобални предизвици, од здравството и климатските промени до енергијата и образованието.
Авторите сметаат дека почестите STEM-активности со семејството, пријателите и наставниците можат да им откријат на децата кариерни патишта за кои претходно не знаеле. На тој начин, желбата да им се помогне на другите може да стане поттик за избор на кариера во науката и технологијата.
