Истражувачи од Универзитетот за наука и технологија „Крал Абдула“ развија метод за внесување големи генетски секвенци на точно определени места во геномот на растенијата, без претходно да се создаваат прекини во ДНК.
Методот, опишан во списанието Nature Biotechnology, успешно бил демонстриран кај тутун и ориз. Научниците успеале да внесат целосни гени и други сложени генетски елементи, со поголема контрола врз нивната позиција и стабилност во геномот.
Досегашните технологии, меѓу кои и CRISPR, се особено ефикасни за прецизно менување на постојните гени. Сепак, внесувањето целосно нови и поголеми генетски инструкции останува значаен предизвик. Тоа е важно за создавање култури отпорни на суша, високи температури и болести, како и за комбинирање повеќе корисни својства во едно растение.
Новата техника се темели на R2 ретротранспозони и овозможува насочено додавање генетски материјал без класичниот пристап на сечење на ДНК. Така се намалува ризикот од несакани промени поврзани со поправката на геномот.
Иако технологијата сè уште е во истражувачка фаза, таа може да помогне во развојот на посложени земјоделски својства и во користењето на растенијата како биолошки фабрики за производство на лекови, вакцини и други вредни биолошки соединенија.
За љубопитноста што нè поврзува.
Вашата донација помага науката да стигне до повеќе читатели.
Ви благодариме што ја поддржувате науката на македонски.
