Интервјуата за работа што ги оценува вештачка интелигенција можат да влијаат врз однесувањето на кандидатите, покажува ново истражување на Универзитетот во Џорџија. Учесниците почесто ги разубавувале своите квалификации кога знаеле дека нивното видео ќе го анализира алгоритам наместо човек.
Во еднонасочните видеоинтервјуа кандидатите ги снимаат одговорите на однапред поставени прашања, без разговор во живо со регрутер. Компаниите сè почесто користат системи со вештачка интелигенција за оценување и рангирање на овие одговори, со цел да заштедат време и ресурси.
Истражувачите откриле дека кандидатите се обидувале да ги погодат критериумите според кои би можел да ги оценува системот. Тоа доведувало до преувеличување на искуството и вештините, бидејќи апликантите сметале дека таквото однесување е неопходно во непредвидлив процес.
Тестираната алатка не ги казнувала кандидатите што ги разубавувале своите квалификации и им давала оценки слични на оние на кандидатите што одговарале искрено. Човечките оценувачи, пак, почесто го препознавале ваквото однесување и давале повисоки оценки на кандидатите кои делувале поавтентично.
Во дополнителен експеримент, една група кандидати добила јасни информации за начинот на оценување. Им било објаснето дека системот ќе ги анализира изразите на лицето, говорот, одредени клучни зборови, тимската работа, способностите поврзани со работата, стилот на работа и личноста.
Кандидатите што ги знаеле овие критериуми покажале слично ниво на автентично однесување како оние што мислеле дека ги оценува човек. Според авторите, поголемата транспарентност не мора да му помага на кандидатот да го „измами“ системот, туку може да му овозможи подобро да го разбере процесот и пореално да се претстави.
Истражувањето, објавено во списанието Information Systems Research, укажува дека компаниите треба внимателно да ги разгледаат начинот на кој автоматизираните системи влијаат врз однесувањето на луѓето и ризикот технологијата да произведе спротивен ефект од очекуваниот.
