Истражувачи од Cedars-Sinai и нивни соработници идентификувале ензим што може да го штити црниот дроб од напредувањето на метаболички дисфункционално поврзаната стеатотична болест на црниот дроб (MASLD), позната и како замастен црн дроб.
Ензимот UBE2N им помага на клетките на црниот дроб да ги отстранат оштетените митохондрии – клеточни структури задолжени за производство на енергија – и да ги разградуваат мастите. Според резултатите, неговото ниво се намалува со напредувањето на болеста, што може да придонесе за воспаление, оштетување на клетките и создавање лузни.
MASLD е една од најчестите заболувања на црниот дроб. Кај дел од пациентите таа преминува во посериозна форма, метаболички дисфункционално поврзан стеатохепатитис (MASH), при кој наталожените масти се проследени со воспаление и фиброза. Денешниот третман главно се потпира на промени во животниот стил, а можностите за лекување сè уште се ограничени.
Во предклинички експерименти, научниците го вратиле нивото на UBE2N во црниот дроб на лабораториски глувци. Кај нив забележале помалку наталожени масти, воспаление и лузнење.
Наодите, објавени во списанието Nature Metabolism, укажуваат дека UBE2N би можел да стане цел за идни терапии. Сепак, потребни се дополнителни истражувања за да се утврди дали овој заштитен механизам е безбеден и ефикасен кај луѓето.
За љубопитноста што нè поврзува.
Вашата донација помага науката да стигне до повеќе читатели.
Ви благодариме што ја поддржувате науката на македонски.
