Научници од Институтот „Волтер и Елиза Хол“ (WEHI) идентификуваа досега занемарувана група имунолошки клетки што може да препознава и уништува ситноклеточен карцином на белите дробови — една од најагресивните форми на оваа болест.
Станува збор за гама-делта Т-клетки, кои можат да ги напаѓаат туморските клетки и кога ракот успева да се скрие од вообичаените имунолошки механизми. Анализата на податоци од клинички испитувања покажала дека пациентите чии тумори содржеле повеќе вакви клетки често имале подобри исходи.
Ситноклеточниот карцином на белите дробови е особено тешко да се лекува. Помалку од седум проценти од пациентите преживуваат пет години по дијагнозата, а имунотерапијата има траен ефект само кај ограничен број случаи. Една од причините е способноста на туморот да избегне откривање од конвенционалните имунолошки клетки.
За да го испитаат дејството на гама-делта Т-клетките, истражувачите создале минијатурни тумори во лабораторија од примероци земени од пациенти. Кога во овие модели биле внесени клетки од крвта на истите пациенти, тие успешно ги препознавале и уништувале клетките на ракот.
Тимот потоа тестирал два веќе постоечки лека: тарлатамаб, кој се користи за лекување на ситноклеточен карцином, и золедронат, одобрен за остеопороза и заболувања на коските поврзани со ракот. Золедронатот го зголемил бројот и активноста на гама-делта Т-клетките, додека тарлатамабот им помогнал полесно да се поврзат со туморските клетки.
Комбинацијата на двата лека значително ја засилила способноста на клетките да го уништуваат ракот во лабораториските експерименти. Овие резултати отвораат можност за развој на пристапи како адаптивен клеточен трансфер, при кој имунолошките клетки се размножуваат надвор од телото, а потоа му се враќаат на пациентот.
Сепак, откритието сè уште треба да се потврди во клинички испитувања. Истражувачите сметаат дека гама-делта Т-клетките би можеле да станат основа за поперсонализирани терапии, особено за тумори што тешко ги препознава традиционалниот имунолошки одговор.
