Европската вселенска агенција го лансираше во орбитата петтиот сателит „Sentinel“(Стражар), во рамките на програмата за набљудување на Земјата „Коперник“.
Сателитот „Sentinel-2B”, кој тежи 1,1 тони бил успешно лансиран од Француска Гвајана и ќе му се придружи на „Sentinel-2A” кој е во орбитата од 2015 година.
Двата сателити имаат опрема за правење на фотографии со висока резолуција и ќе помогнат да се добијат многу прецизни податоци кои ќе можат да се користат за земјоделството и за истражување на климатските промени и животната средина.
„Sentinel-2B” ќе помогне да се следат загадувањата на езерата и крајбрежните води и во следењето на промените на Земјата, а може да помогне и во изработката на мапи на природните катастрофи, преку обезбедување на информации за поплави, вулкански ерупции и свлечишта.
Европската вселенска агенција соопшти дека програмата „Коперник“ сега може да направи фотографии на целата Земја за само пет дена, или два пати пократко од претходно.
