НАСА формираше оддел за планетарна одбрана

НАСА формираше ново тело за да ги надгледува своите тековни напори за детектирање и следење на објекти во близина на Земјата. Се работи за координативен оддел за планетарна одбрана кој ќе ги контролира сите проекти финансирани од НАСА за идентификување и анализирање на секој астероид или комета која поминува во близина на орбитата на Земјата околу Сонцето.

Од 1988 година, кога НАСА започнала да ги следи астероидите и кометите, забележани се повеќе од 13.500 објекти во близина на Земјата, и таа бројка се зголемува за приближно 1.500 годишно. За повеќето од нив воопшто не сме слушнале бидејќи не претставувале никаква опасност, но некои се доближиле доволно за да предизвикаат загриженост.

Астрономите веќе лоцирале повеќе од 90% од објектите во близина на Земјата кои се поголеми од 1 км. во должина со помош на телескопи, а сега вниманието го насочуваат кон помалите објекти од околу 140 метри, или отприлика колку едно фудбалско игралиште. Иако овие објекти се значително помали, се’ уште претставуваат значителен ризик во случај на удар, па НАСА сака да открие 90% од нив до крајот на декадата.

Координативниот оддел за планетарна одбрана ќе ја информира јавноста за најновите податоци и ќе издава предупредувања во случај НАСА да детектира некаква опасност, со цел да се спречат сите лажни закани за удари од астероиди кои се појавуваат на интернет. Одделот исто така ќе соработува и со Федералната агенција за справување со итни случаи и други меѓународни партнери за да помогне во коордирањето на реакциите во случај на вистинска закана од удар.