Кога еден сателит ќе снема гориво или нема да успее во распоредувањето на соларните панели, кој може да го поправи тоа? Во моментов, не постои сигурен начин за да се поправат физички работи во вселената, што значи мултимилионските сателити може да станат бескорисни доколку се појави некој мал проблем. Но, НАСА сепак, се залага за решение. Оваа недела, вселенската агенција објави дека одвојува 127 милиони долари за финансирање на сателит кој ќе ги поправа и ќе ги дополнува со гориво другите во орбитата.
Сателитот „Restore-L“ го развива компанија наречена „Space Systems Loral“ во Пало Алто, Калифорнија. Сателитот ќе има автономна навигација, подвижни роботски раце, комплет на алатки и гориво за да ги дополнува вселенските летала на кои им е потребно.
Според проценките на компанијата, сателитот може да се лансира во 2020–тата година. Неговата прва мисија може да биде да го дополни со гориво „Landsat-7“, кој обезбедува сателитски снимки за Геолошкиот институт на САД.
Покрај сервисирањето на сателити кои инаку би се изгубиле, НАСА смета дека „Restore-L“ може да го отвори и патот за орбитални станици за полнење гориво и производствени центри. Исто така, може да помогне во чистењето на остатоци кои ги загрозуваат другите вселенски летала во орбитата.
