Семаглутидот, активната состојка во лековите Ozempic и Wegovy, е поврзан со 21 отсто помал ризик од психијатриска хоспитализација кај луѓе со биполарно растројство, покажува голема шведска студија.
Истражувачите од Универзитетот Грифит анализирале национални здравствени податоци за речиси 15.000 лица со биполарно растројство, следени во период од 15 години, од 2009 до 2024 година. Кај оние што користеле семаглутид, стапката на психијатриски хоспитализации била пониска во споредба со периодите кога не примале GLP-1 лекови.
Научниците претпоставуваат дека влијанието врз воспалението, клеточниот стрес и други биолошки процеси поврзани со мозокот би можело да придонесе за постабилно расположение и помал ризик од влошување на состојбата.
Сепак, резултатите не биле исти за сите лекови од оваа група. Лираглутидот и дулаглутидот не покажале поврзаност со намален ризик од психијатриска хоспитализација, што укажува дека можниот ефект не мора да важи за сите GLP-1 агонисти.
Бидејќи станува збор за опсервациска студија, таа не докажува дека семаглутидот директно го спречува хоспитализирањето. Истражувачите повикуваат на рандомизирано клиничко испитување што би можело посигурно да утврди дали лекот има психијатриски придобивки кај лицата со биполарно растројство.
Студијата е објавена во списанието Acta Psychiatrica Scandinavica.
