Климатските промени и уништувањето на шумите се закануваат дека ќе ги отстранат во целост дивите видови на кафе во светот, меѓу кои и популарните комерцијални кафиња арабика и робуста.
Актуелните мерки за зачувување на дивите видови на кафе не се доволни за да ја заштитат својата долгорочна иднина, се вели во студијата објавена од експертите од Британската кралска ботаничка градина во Лондон, Кју гарден.
Шефот на секторот за истражување на кафето, кој е лидер и на оваа студија, Арон Дејвис вели дека во видови на кафе на кои им се заканува исчезнување спаѓаат и оние видови кои би можеле да се употребат за одгледување на истото во иднина.
Тоа вклучува и некои видови кои се отпорни на болести и кои можат да ги издржат и најлошите климатски услови.
Според неговите зборови, итно е потребна акција во одредени тропски земји, пред се во Африка и особено во шумските области кои се погодени од климатските промени.
“Додека температурите се зголемуваат и врнежите се намалуваат – поволни зони за одгледување на кафе има се помалку”, вели Дејвис.
Овие податоци не се важни само за љубителите на кафе. “Постојат многу земји кои зависат од кафето поради приходи. Се проценува дека околу 100 милиони лица произведуваат кафе на фармите ширум светот”, објаснува британскиот научник.
