НАСА ја развива својата прва роботска мисија за посета на голем астероид кој се наоѓа во близина на Земјата, при која треба да собере голем примерок од тој астероид и да го пренасочи во стабилна орбита околу Месечината. Потоа, астронаутите ќе го истражуваат и ќе донесат помали примероци од него на Земјата за понатамошни испитувања.
Оваа мисија за пренасочување на астеориди (Asteroid Redirect Mission (ARM)) е дел од планот на НАСА за унапредување на нови технологии и летала кои се потребни за човечката мисија на Марс во 2030-тите години.
Во понеделникот, во својата објава, НАСА истакна дека во „блиска иднина“ ќе ја активира мисијата за пренасочување на астероиди со партнерства (Asteroid Redirect Mission Umbrella for Partnerships (ARM-UP)), што во основа ќе претставува шанса за приватните компании да и помогнат да ја обезбеди потребната опрема за да испрати роботско летало на астероид (што е планирано за 2021 година), при што роботот ќе земе „примордијална мулти-тонска маса“ (карпа) и ќе ја довлечка во орбита околу Месечината. Потоа, после 5 години (во 2026 година), НАСА ќе испрати астронаути на овој релоциран астероид во ново летало на „Orion“ и ќе земе помали примероци кои ќе ги врати на Земјата за понатамошни анализи и проучувања.
Научниците се надеваат дека овие примероци ќе овозможат нови откритија за животот на Земјата, за тоа како тој првично настанал и за тоа како може да се користат астероидите како ресурси.
НАСА ја нарекува оваа мисија демострација на способностите и со оглед на тоа што Конгресот, како и некои планетарни научници, не го одобруваат ова, агенцијата реши да побара надворешни партнерства. НАСА планира да ја отвори оваа мисија следниот месец и да остане отворена до август 2018 година за сите компании кои сакаат да се приклучат. Најверојатно агенцијата е подготвена и да им плати одредена сума на тие компании, но се’ уште не се знае за колкава сума станува збор.
