НАСА одобри нова мисија за леталото што прелета покрај Плутон

По спектакуларното прелетување покрај Плутон минатиот јули, леталото „Нови Хоризонти“ сега официјално е насочено кон својата нова дестинација, пред да му снема гориво. НАСА формално одобри продолжување на неговата мисија, за да го посети „2014 MU69“ – мал антички објект со пречник од само 30 до 40 километри (минијатурен во споредба со 2370 километарскиот пречник на Плутон).

„Возбудени сме што ќе продолжиме да патуваме во темните длабочини на крајот на сончевиот систем за да достигнеме научна цел која не беше дури ни откриена во 2006 година, кога го лансиравме леталото“, вели Џим Грин, директор на планетарните науки на НАСА.

За да ја достигне оваа цел, „Нови Хоризонти“ ќе се упати кон Кајперовиот појас каде што се наоѓаат милиони ледени тела кои се смета дека се остатоци од раѓањето на нашиот сончев систем пред 4,6 милијарди години. Ако се биде во ред, „Нови Хоризонти“ ќе ја достигне целта на 1 јануари 2019 година.

Објектите како „MU69“ се особено важни бидејќи се смета дека настанале во раните денови на нашиот сончев систем, па претставуваат еден вид на временска капсула, што значи дека може да содржат траги за градежните елементи на планетарните системи.

НАСА исто така одобри продолжување на мисијата на вселенското летало „Зора“ (Dawn), кое ќе остане во долга стабилна орбита околу Церера за да дознаеме повеќе и за овој мал мистериозен свет.

Извор: „New Scientist“.