Се нарекува целосно затемнување на Супер Месечина и во текот на последниве 115 години се случил само 5 пати.
Целосното затемнување на Месечината е ретко, но на Супер Месечината е уште поретко бидејќи се случуваат две работи кои обично не се случуваат истовремено – Супер Месечина и целосно затемнување.
Супер Месечина е колоквијалното име за полна (или нова) Месечина, кога таа се наоѓа наблиску до Земјата. Во недела, Месечината ќе биде на само 356.877 км. од Земјата, што е многу поблиску од просечната оддалеченост од 384.472 км.
Како резултат на тоа, Месечината ќе изгледа околу 13% поголема од нормалното. Иако не се работи за огромна разлика, целосното затемнување е глетка што нема да сакате да ја пропуштите.
Каде ќе може да се види?
Настанот ќе започне на 27 септември, во 21 часот и 7 минути по источната временска зона (во Америка), што значи 3 часот и 7 минути после полноќ по наше (веќе 28 септември). Најдобро ќе може да се види од источниот брег на САД, западна Европа и Африка бидејќи ќе можат да се видат сите 5 главни фази на затемнувањето.
Главниот настан – кога Месечината целосно ќе се обвитка во сенката на Земјата, ќе биде видлив и ќе трае 1 час и 12 минути. Доколку небото е облачно, може да го проследите целиот настан онлајн.
НАСА ќе започне пренос во 20 часот по источната временска зона, што значи 2 часот по полноќ по наше. На веб страницата на „Sky and Telescope“ ќе има пренос од 21 часот, што значи 3 часот по полноќ по наше и на онлајн опсерваторијата „Slooh“ преносот ќе започне во 20 часот, односно 2 часот по полноќ по наше.
За време на затемнувањето, сончевата светлина нема директно да допре до Месечината, но наместо црна боја, Месечината ќе добие прекрасна црвена боја.
