Мажи, носете боксерки!

Според резултатите од една неодамнешна студија, спроведена од Универзитетот Стенфорд во Калифорнија, кај мажите кои преку ден носеле боксерки, а за време на спиењето не носеле долна облека, било забележано значително помало ниво на оштетување на ДНК во нивната сперма. За потребите на истражувањето, во период од една година биле опфатени 500 мажи, кои се обидувале да станат родители. Истражувачите откриле дека мажите кои носеле боксерки преку ден и воопшто не носеле долна облека ноќе имале за 25% помалку оштетувања на ДНК на нивната сперма, во споредба со мажите кои носеле тесна долна облека и преку ден и ноќе.

Иако истражувањето е направено на релативно мал примерок, тоа претставува уште еден доказ дека навиките за носење комотна долна облека може значително да придонесат за машката плодност. Според тоа, идните татковци или воопшто мажите што се грижат за здравјето на својата сперма би требало да се определат за носење комотна долна облека (или воопшто да не носат), бидејќи со тоа ја штитат својата репродуктивна моќ.

Истражувањето e презентирано на состанокот на Американското здружение за репродуктивна медицина во Балтимор.