Американскиот алигатор, чие име е Мујо, за кој се верува дека е најстариот жив припадник на својот вид, сеуште има добро здравје и одличен апетит. Ја помина и својата 80та година во зоолошката градина “Добре наде” во Белград, каде се доселил уште пред Втората светска војна.
Многу од граѓаните на Белград и бројни туристи ја посетуваат оваа зоолошка градина токму поради Мујо, кој може да го видат како грицка глувци и препелици.
Со текот на годините само помалку станал подвижен. Единствениот здравствен проблем кој досега го измачувал овој алигатор низ годините е гангрената поради што во 2012та година му е ампутирана десната предна канџа.
“Мујо има добро здравје, нема проблеми со исхраната и за своите години е во добра форма. Се надеваме дека уште многу години ќе остане во истата состојба”, вели директорот на зоолошката градина, Србољуб Алексиќ.
Мујо во 1937 година во Белград пристигнал од Германија, а медиумите од тоа време пишувале дека тогаш имал само 2 години.
Најстариот американски алигатор преживеал две бомбардирања на Белград, германското во 1941 година, а потоа во 1944, кога е изгубена неговата документација за преместувањето.
