Научниците од САД и Австралија го набљудуваа овој феномен во сончевиот систем околу ѕвездата „LkCa 15“ која е оддалечена 450 светлосни години од Земјата.
Фотографирањето на планетата во процесот на формирање е возбудливо за научниците бидејќи од речиси 2.000 егзопланети кои досега се идентификувани, ниедна не била во процесот на формирање.

Резултатите се објавени во „Nature“ и опишуваат како „LkCa15“ е опкружена со посебен вид на протопланетарен диск, кој се формира околу млади ѕвезди од остатоците од нивното формирање. Хипотезата на научниците, која сега е поткрепена со фотографии, е дека планетите се формираат во внатрешноста на дискот, преку спојувањето на остатоците и прашината.
Ѕвездата „LkCa15“ е стара околу 2 милиони години, но тоа е релативно малку за ѕвезда и е доволно за се’ уште да ги има остатоците од нејзиното раѓање. Научниците ја следат уште од 2009 година со помош на телескопот „LBT“ во Аризона и „Магелан“ во Чиле и велат дека дури три планети се во процес на формирање околу ѕвездата.
За љубопитноста што нè поврзува.
Вашата донација помага науката да стигне до повеќе читатели.
Ви благодариме што ја поддржувате науката на македонски.




























