Океаните се едни од најмалку истражуваните и најмистериозните места на нашата Земја. Засега околу 95% од морското дно е неистражено, па ни останува само да замислиме што се’ може да има таму долу.
Тоа полека се менува, благодарение на напредокот на технологијата и развојот на ровери кои можат да одат се подлабоко.
На 27 февруари, истражувачкиот брод „Okeanos Explorer“ на Националната океанска и атмосферска управа ја заврши својата прва мисија во 2016 година која опфаќаше истражување на една област во Хавајскиот Архипелаг за да се соберат информации за морското дно помеѓу островот Некер и морскиот гребен Некер. Но, целата мисија беше попречена од појавата на мал, симпатичен октопод кој наликува на дух и можеби претставува сосема нов вид.
Истражувачите го снимиле октоподот со помош на далечински управувано возило кое требало да собере примероци од морското дно на околу 4.290 метри под површината. Ова воедно е и најголемата длабочина на која е забележан ваков вид на мекотели.
Научниците сметаат дека се работи за нов вид, а можеби и сосема нов род, бидејќи овој октопод нема хроматофори – пигментни клетки кои се карактеристични за повеќето главоноги и се чини дека не е многу развиен. Поради неговиот изглед, на социјалните медиуми се појавија многубројни коментари кои предлагаат да се именува Каспер, како пријателскиот дух од цртаните.
https://www.youtube.com/watch?v=FDH5AXQ9iCk
