Во Австралија откриен нов вид на отровна змија

На западниот брег од полуостровот Јорк во Австралија, еден тим од научници открива нов подвид на отровна змија, која меѓу домородното население е позната под името “банди-банди”.

Овој вид припаѓа на родот Vermicella, дел од поширокото семејство на кобри (Elapidae). Единките се мали, долги околу 50-100 сантиметри, црно-бели, не се агресивни, но отровни за разлика од нивните познати роднини. Постојат седум подвидови на овој род, од кој змијата (Vermicella annulata) е најшарена и најпрепознатлива во северо-западна Австралија.

Новооткриениот подвид е наречен Vermicella parsacauda, а е пронајден во областа Јорк во Квинсленд.

“Случајното откритие се случи кога ги истражувавме морските змии”, вели лидерот на тимот Д-р. Брајан Фрај, биолог од Универзитетот во Квинсленд.

“Змиите од родот Vermicella по правило населуваат живеалишта со богата вегетација, па бевме изненадени кога ја пронајдовме на бетонскиот брег покрај морето.” – објаснува тој.

Д-р Фрај и неговите колеги стравуваат дека опстанокот на видот Vermicella parsacauda е загрозен. Имено, рударството е главна гранка во регионот и секако влијае на неговиот биодиверзитет, кој инаку е богат со флора и фауна.

“Секој нов вид на змии е драгоцен и мораме сите да ги заштитиме, бидејќи не можеме да предвидиме која единка ќе биде основа за развој на идните фармацевтски препарати”, истакнува Д-р. Фрај.

Откривањето на тие мали видови на змии треба да не потсети на тоа колку всушност малку знаеме за различноста на флората и фауната, и колку видови можат неповратно да исчезнат пред да ги откриеме.

 

Поддржете ја нашата работа: