Истражувачите проучувале 2 538 адолесценти од 16 средни училишта во Јужна Калифорнија во периодот помеѓу мај 2013 и април 2014 година. Тие откриле дека тинејџерите кои пријавиле проблеми со спиењето, имале 55% повеќе шанси за користење на алкохол или марихуана во претходниот месец. Поврзаноста помеѓу спиењето и употребата на алкохол или марихуана била постојана, дури и по контролата на други познати ризик-фактори, како што е депресијата. Резултатите, објавени во списанието „Sleep Health“, главно се конзистентни кај сите расни и етнички групи.
„Подоброто разбирање на поврзаноста помеѓу спиењето и употребата на алкохол и/или марихуана е особено важна за родителите, училиштето, како и сите други вклучени во напорите за превенција на употребата на алкохол и дрога за оваа возрасна група“, вели Венди Троксел, главен автор на истражувањето.
Истражувачите нагласуваат дека иако поврзаноста е постојана, не може да се утврди причината и ефектите без дополнителни истражувања. Истражувачите моментално собираат дополнителни податоци од долгорочни истражувања за да проучат дали проблемите со спиењето ја предвидуваат или доведуваат до употребата на дрога и/или марихуана кај тинејџерите.
Што се однесува до спиењето, истражувачите препорачуваат стратегии на индивидуално ниво, како и политики за подобрување на сонот кај адолесцентите. На пример, часовите во училиште да започнуваат подоцна, што е препорачано и од Американската академија за педијатрија и други професионални организации.
